Published on 30 Aug, 2024
រដ្ឋធានីវៀងចន្ទន៍៖ ថ្ងៃទី២៧ ដល់ទី២៩ ខែសីហា ឆ្នាំ២០២៤ លោកជំទាវ ឧត្ដមសេនីយ៍ទោ រ៉ន សិរីលក្ខិណា អគ្គលេខាធិការរង ទទួលបន្ទុកក្រុមជំនួយកិច្ចការសហប្រតិបត្តិការជាតិ អន្តរជាតិ និងជាសមាជិកក្រុមការងារ SOMTC កម្ពុជា បានអញ្ជើញចូលរួមក្នុងនាមជាសមាជិកប្រតិភូកម្ពុជា ដែលដឹកនាំដោយ ឯកឧត្ដម នាយឧត្ដមសេនីយ៍ ប៉ោ ភក្ដិ រដ្ឋលេខាធិការក្រសួងមហាផ្ទៃ និងជាប្រធានក្រុមការងារ SOMTC-កម្ពុជា តំណាងដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា រដ្ឋមន្រ្តីក្រសួងមហាផ្ទៃ ក្នុងកិច្ចប្រជុំកិច្ចប្រជុំមន្រ្តីជាន់ខ្ពស់ដើម្បីពិគ្រោះយោបល់ម្រាប់កិច្ចប្រជុំថ្នាក់រដ្ឋមន្រ្តីអាស៊ាន (SOMTC Preparatory for AMMTC Consultations) និងកិច្ចប្រជុំថ្នាក់រដ្ឋមន្ត្រីអាស៊ានទទួលបន្ទុកឧក្រិដ្ឋកម្មឆ្លងដែនលើកទី១៨ ដែលបានប្រព្រឹត្តទៅចំនួន៣ថ្ងៃ ថ្ងៃទី ២៧-២៨-២៩ ខែសីហា ឆ្នាំ២០២៤ នៅរដ្ឋធានីវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ ។សមាសភាពគណប្រតិភូកម្ពុជាក្នុងពេលនោះក៏មាន៖ ឯកឧត្ដម ផាត សុផានិត, ឯកឧត្ដម ជា ពៅ, លោកជំទាវ វិរក្ស វិជ្ជតា, ឯកឧត្តម សិទ្ធិ ប៊ុនធី, និងមន្រ្តីលេខាធិការដ្ឋាន ៨រូប ។ក្នុងកិច្ចប្រជុំនេះ រួមមានកិច្ចប្រជុំថ្នាក់រដ្ឋមន្ត្រីនៃប្រទេសសមាជិកអាស៊ាន កិច្ចប្រជុំថ្នាក់រដ្ឋមន្ត្រីអាស៊ាន+៣ (ចិន ជប៉ុន កូរ៉េ) និងកិច្ចប្រជុំថ្នាក់រដ្ឋមន្រ្តីអាស៊ាន+១ (មាន ចិន ជប៉ុន និងកូរ៉េ)។ ក្នុងរយៈពេលកិច្ចប្រជុំ៣ថ្ងៃនេះ ភាគីកម្ពុជា ក៏បានទទួលជំនួបទ្វេរភាគីចំនួន៤ រួមមាន ជាមួយភាគីថៃ កូរ៉េ ឡាវ និងអគ្គលេខាធិការអាស៊ាន។
នៅក្នុងកិច្ចប្រជុំពេញអង្គអំឡុងពេលទាំង៣ថ្ងៃ ភាគីទាំងអស់ បានផ្តោតការយកចិត្តទុកដាក់ និងផ្ដល់សារអន្តរាគមន៍ទៅលើចំនុចរួមសំខាន់បី ១- ការងារប្រឆាំងបទល្មើសបច្ចេកវិទ្យា (Online Scam, Scam Job - forced criminality, Computer crime, technology crime ...) ២- ការប្រឆាំងការជួញដូរគ្រឿងញៀន និងសារធាតុខុសច្បាប់ និង៣- ការងារប្រឆាំងការរត់ពន្ធ និងជួញដូរមនុស្ស ។
ក្នុងពេលនោះដែរអង្គប្រជុំបានធ្វើការអនុម័ត លើឯកសារសំខាន់ៗចំនួន៧ និង១ឯកសារពិនិត្យពិភាក្សាសម្រាប់ដាក់អនុម័តនៅក្នុងកិច្ចប្រជុំកំពូលអាស៊ាននៅចុងឆ្នាំ២០២៤ ដែលក្នុងនោះមាន សេចក្ដីប្រកាសវៀងចន្ទ ពង្រឹងកិច្ចសហប្រតិបត្តិការអនុវត្តច្បាប់ប្រឆាំងការឆបោកការងារលើប្រព័ន្ធអនឡាញ (Vientiane Declaration on Enhancing Law Enforcement Cooperation Against Online Job Scams) ត្រូវបានអនុម័ត ៕
