លោកជំទាវ ជូ ប៊ុនអេង ដឹកនាំគណៈប្រតិភូនៃគណៈកម្មាធិការជាតិគ.ជ.ប.ជ ដែលមានតំណាងមកពី ស្ថានទូតកម្ពុជាប្រចាំនៅហ្វីលីពីន បានអញ្ជើញចូលរួមកិច្ចសន្ទនាថ្នាក់តំបន់ និងការផ្លាស់ប្តូរចំណេះដឹងរវាងកម្ពុជា និងហ្វីលីពីន “ The Regional Dialogue and Knowledge Exchange Between Cambodia and the Philippines ” នៅទីក្រុងម៉ានីល ប្រទេសហ្វីលីពីន
BY SOM SIVWINPublished on 29 Apr, 2025
ទីក្រុងម៉ានីឡា ប្រទេសហ្វីលីពីន៖ ព្រឹកថ្ងៃអង្គារ ៣កើត ខែពិសាខ ឆ្នាំម្សាញ់ សប្តស័ក ព.ស២៥៦៨ ត្រូវនឹងថ្ងៃទី២៩ ខែមេសា ឆ្នាំ២០២៥ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គ.ជ.ប.ជ បានដឹកនាំគណៈប្រតិភូនៃគណៈកម្មាធិការជាតិ គ.ជ.ប.ជ ដែលមានតំណាងមកពី ស្ថានទូតកម្ពុជាប្រចាំនៅហ្វីលីពីន ក្រសួងសង្គមកិច្ចអតីតយុទ្ធជននិងយុវនីតិសម្បទា ក្រសួងយុត្តិធម៌ អគ្គលេខាធិការដ្ឋាន គ.ជ.ប.ជ អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ចូលរួមកិច្ចសន្ទនាថ្នាក់តំបន់ និងការផ្លាស់ប្តូរចំណេះដឹងរវាងកម្ពុជា និងហ្វីលីពីន “The Regional Dialogue and Knowledge Exchange Between Cambodia and the Philippines ” ចាប់ពីថ្ងៃទី២៩ ដល់ថ្ងៃទី៣០ ខែមេសា ឆ្នាំ២០២៥ នៅទីក្រុងម៉ានីល ប្រទេសហ្វីលីពីន ។
សមាសភាព គណៈប្រតិភូហ្វីលីពីន ជាតំណាងក្រុមប្រឹក្សាអន្តរស្ថាប័នថ្នាក់ជាតិ ប្រឆាំងអំពើជួញដូរមនុស្ស អញ្ជើញពី ក្រសួងសង្គមកិច្ច ក្រសួងការបរទេស នគរបាលជាតិហ្វីលីពីន ការិយាល័យថ្នាក់ជាតិសម្រាប់ការស៊ើបអង្កេត ក្រសួងពលករទេសន្តរប្រវេសន៍ ការិយាល័យអន្តោប្រវេសន៍ គណៈកម្មការប្រឆាំងបទល្មើសដែលមានអង្គការចាត់តាំង មជ្ឈមណ្ឌលហ្វីលីពីនប្រឆាំងបទល្មើសឆ្លងដែន អាជ្ញាធរជាតិការពារកុមារ និងគណៈកម្មការកិច្ចការជនជាតិហ្វីលីពីននៅក្រៅប្រទេស ។
កិច្ចសន្ទនាមានគោលបំណង ចែករំលែកចំណេះដឹង បទពិសោធន៍ និងពង្រឹងកិច្ចសហប្រតិបត្តិការ ទ្វេភាគី លើការពង្រឹងសមត្ថភាព និងសហការអនុវត្តនូវកិច្ចខិតខំប្រឹងប្រែង ផ្សេងៗ ដែលអាចឈានទៅបង្កើតបាននូវ ដំណោះស្រាយរួមគ្នា ក្នុងកិច្ចការប្រយុទ្ធប្រឆាំងអំពើជួញដូរមនុស្ស ជាពិសេសសម្រាប់ទម្រង់ថ្មី នៃអំពើជួញដូរមនុស្ស និងបទល្មើសពាក់ព័ន្ធ ៕
