Published on 29 Aug, 2024
ក្រុងខេមរភូមិន្ទ៖ នាថ្ងៃព្រហស្បតិ៍ ១០រោច ខែស្រាពណ៏ ឆ្នាំរោង ឆស័ក ព.ស ២៥៦៨ ត្រូវនឹង ថ្ងៃទី២៩ ខែសីហា ឆ្នាំ២០២៤ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គ.ជ.ប.ជ បានអញ្ជើញជាអធិបតីដ៏ខ្ពង់ខ្ពង់ក្នុងកម្មវិធីបើកវគ្គបណ្តុះបណ្តាល ស្តីពី បែបបទនិងនីតិវិធីក្នុងការកំណត់អត្តសញ្ញាណជនរងគ្រោះដោយអំពើជួញដូរមនុស្ស ដើម្បីផ្តល់សេវាសមស្រប រៀបចំឡើងដោយអគ្គលេខាធិការដ្ឋាន នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស រយៈពេល២ថ្ងៃគិតចាប់ពីថ្ងៃទី២៨-២៩ ខែសីហា ឆ្នាំ២០២៤ នៅសាលាខេត្តកោះកុង សហការឧបត្ថមដោយរដ្ឋបាលខេត្តកោះកុង និងអង្គការយុត្តិធម៌អន្តរជាតិ (IJM)។ សមាសភាពអមគណៈអធិបតីរួមមាន លោកជំទាវ មិថុនា បូថង អភិបាលនៃគណៈអភិបាលខេត្តកោះកុង និងជាប្រធាន គ.ខ.ប.ជ លោកជំទាវ ឧត្តមសេនីយ៍ឯក វេជ្ជបណ្ឌិត ប៉ុណ្ណ សំខាន់ អគ្គលេខាធិការ នៃអគ្គលេខាធិការដ្ឋាន គ.ជ.ប.ជ ឯកឧត្តម ស្រេង ហុង អភិបាលរងខេត្តកោះកុង និងជាប្រធានលេខាធិការដ្ឋាន គ.ខ.ប.ជ ខេត្តកោះកុង ឯកឧត្តម ឧត្តមសេនីយ៍ឯក លី តុងហ៊ុយ អគ្គលេខាធិការង ឧត្តមសេនីយ៍ទោ សេក ស៊ីវ៉េត ប្រធានក្រុមជំនួយកិច្ចការទេសន្តរប្រវេសន៍ ឧត្តមសេនីយ៍ទោ គឹម ភាព អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ ក្រសួងមហាផ្ទៃ ឧត្តមសេនីយ៍ត្រី ពេជ្រ ស្រីពី ស្នងការរងនគរបាលខេត្តកោះកុង ឧត្តមសេនីយ៍ត្រី តាំង ស៊ុនស្រេង មេបញ្ជាការកងរាជអាវុធហត្ថខេត្តកោះកុង លោកស្រី សុខ សុធារី ប្រធានមន្ទីរកិច្ចការនារី ខេត្តកោះកុង និងលោក James Kyronjee តំណាងអង្គការយុត្តិធម៌អន្តរជាតិ (IJM) ។
វគ្គបណ្តុះបណ្តាលនេះរៀបចំឡើងក្នុងគោលបំណង ពង្រឹងសមត្ថិភាពមន្ត្រីនិងកងកម្លាំងជួរមុខ លើជំនាញកំណត់អត្តសញ្ញាណជនរងគ្រោះដោយអំពើជួញដូរមនុស្ស ដើម្បីលើកកម្ពស់ប្រសិទ្ធិភាព ក្នុងការបង្ការទប់ស្កាត់ ប្រយុទ្ធប្រឆាំង បទលើ្មសជួញដូរមនុស្ស និងការផ្តល់សេវាជួយដល់ជនរងគ្រោះ។
សិក្ខាកាមដែលមានវត្តមានចូលរួមក្នុងវគ្គបណ្តុះបណ្តាលនេះរួមមានមកពី អធិការដ្ឋាននគរបាល ក្រុងខេមរភូមិន្ទ ស្រុកកោះកុង ស្រុកគីរីសាគរ ស្រុកថ្មបាំង ស្រុកមណ្ឌលសីមា ស្រុកបុទុមសាគរ ស្រុកស្រែអំបិល ស្រុកកំពង់សីលា នគរបាលវរការពារព្រំដែនគោកលេខ ៨២៧ នៃស្នងការដ្ឋាននគរបាលខេត្តកោះកុង នាយកដ្ឋានការពារព្រំដែនទឹក និងការិយាល័យប្រឆាំងការជួញដូរមនុស្ស នៃកងរាជអាវុធហត្ថខេត្តកោះកុង សរុបចំនួន ៥០រូប (ស្រី១៤រូប)។
មានមតិសំណេះសំណាលក្នុងពិធីបើកវគ្គបណ្តុះបណ្តាល លោកជំទាវ ជូ ប៊ុនអេង រដ្ឋលេខាធិការ បានសង្កត់ធ្ងន់ថា និន្នាការបទល្មើសជួញដូរមនុស្ស បាននឹងកំពុងវិវឌ្ឍន៍យ៉ាងឆាប់រហ័ស ទៅរកភាពទំនើបជាងមុន និងកាន់តែស្មុគស្មាញជាងមុន ដែលមន្ត្រីកងកម្លាំងមានសមត្ថកិច្ចចាំបាច់ត្រូវអភិវឌ្ឍន៍ខ្លួន ដើម្បីតាមទាន់ជនល្មើស ក្នុងសម័យឌីជីថលនេះផងដែរ។ កន្លងមកយើងតែងតែទទួលបានរបាយការណ៍ជាច្រើនពីក្រសួងស្ថាប័នជំនាញ និងថ្នាក់ក្រោមជាតិ ប៉ុន្តែយើងពិនិត្យឃើញថាទិន្នន័យនៃបទល្មើសទាំងនោះ ពុំបានញែកឲ្យបានច្បាស់រវាងបទល្មើសទូទៅ និងបទល្មើសជួញដូរមនុស្ស ជាហេតុធ្វើឲ្យរូបភាពកម្ពុជាមិនល្អនៅលើឆាកអន្តរជាតិ។ ហេតុនេះការកំណត់អត្តសញ្ញាណជនរងគ្រោះដោយអំពើជួញដូរមនុស្ស គឺជាយន្តការចាំបាច់និងសំខាន់បំផុត។
នៅទីបញ្ចប់ លោកជំទាវ បានធ្វើការផ្តាំផ្ញើឱ្យសិក្ខាកាមទាំងអស់ ត្រូវយកចិត្តទុកដាក់ខ្ពស់ ក្នុងការចូលរួមក្រេបយកចំណេះដឹង បង្កើនសមត្ថភាពខ្លួន ដើម្បីយកទៅអនុវត្តការងាររបស់ខ្លួនប្រកដោយ គុណភាព ប្រសិទ្ធភាព និងតម្លាភាព ៕
អត្ថបទ រូបភាព៖ លោកវរសេនីយ៍ទោ រ៉ន សុភ័ក្រ្តបញ្ញា
